27.05.20
Ríkissjóður gefur út skuldabréf í evrum

Ríkissjóður Íslands gaf í dag út skuldabréf að fjárhæð 500 milljónir evra, jafnvirði um 76 milljarða króna. Skuldabréfin bera 0,625% fasta vexti og voru gefin út til 6 ára á  ávöxtunarkröfunni 0,667%.

Fjárfestar sýndu útgáfunni mikinn áhuga og nam eftirspurn um 3,4 milljörðum evra eða nærri sjöfaldri fjárhæð útgáfunnar. Fjárfestahópurinn samanstendur af seðlabönkum og öðrum fagfjárfestum, aðallega frá Evrópu. Umsjón útgáfunnar var í höndum Citi,  JP Morgan og Morgan Stanley. 

„Þessi lántaka er staðfesting á greiðum aðgangi ríkissjóðs að fjármagni á alþjóðamörkuðum og sýnir tiltrú fjárfesta á þann viðnámsþrótt sem byggður hefur verið upp á síðustu árum. Hún eykur getu okkar til að mæta afleiðingum heimsfaraldurs kórónuveiru og endurspeglar mikinn styrk og getu til að sigrast á efnahagslegum afleiðingum hans.“ segir Bjarni Benediktsson fjármála- og efnahagsráðherra. 

Í útboðsferlinu bötnuðu kjör ríkissjóðs um 30 punkta vegna mikillar eftirspurnar. Vel yfir 200 aðilar sýndu útgáfunni áhuga, eða um helmingi fleiri aðilar en í síðustu útgáfu ríkissjóðs, og heildareftirspurn nam um sjöfaldri útboðsfjárhæðinni.

„Útgáfan er í samræmi við stefnu ríkissjóðs í lánamálum, auðveldar aðgengi annarra innlendra aðila að erlendum lánsfjármörkuðum og staðfestir greiðan aðgang ríkissjóðs að stórum og fjölbreyttum hópi fjárfesta. Markaðir hafa verið líflegir að undanförnu enda eru mörg ríki í sömu sporum, að tryggja sér fjármagn til lengri tíma," segir Bjarni Benediktsson.      

Aðrar fréttir

Fitch staðfestir A lánshæfiseinkunn ríkissjóðs með stöðugum horfum

Lánshæfismatsfyrirtækið Fitch Ratings hefur birt mat á lánshæfi ríkissjóðs. Lánshæfiseinkunn er óbreytt í A og horfur eru stöðugar. 

Í fréttatilkynningu Fitch segir að A lánshæfiseinkunn ríkissjóðs endurspegli miklar tekjur á mann og góða stjórnarhætti, sem eru sambærilegri við lönd með AAA og AA lánshæfiseinkunn. Til styrkleika teljast verulegar lífeyrissjóðseignir, traust fjármálakerfi og sterkir efnahagsreikningar einkageirans. Rúmur gjaldeyrisforði dregur úr næmni hagkerfisins gagnvart ytri áföllum. Hins vegar halda smæð hagkerfisins og einsleitni útflutnings aftur af einkunninni. 

Aukin tiltrú á markverða og viðvarandi lækkun skuldahlutfalls hins opinbera, meiri leitnivöxtur þjóðarbúsins og/eða vísbendingar um aukna fjölbreytni hagkerfisins sem minnka næmni hagkerfisins gagnvart ytri áföllum gætu haft jákvæð áhrif á lánshæfiseinkunn ríkissjóðs. 

Markverð hækkun skuldahlutfalls hins opinbera, vegna viðvarandi slaka í ríkisfjármálum eða alvarlegt efnahagsáfall, til dæmis vegna skarprar leiðréttingar á fasteignamarkaði, gætu haft neikvæð áhrif á lánshæfiseinkunn ríkissjóðs. 

Sjá nánar á www.stjornarradid.is

Tilkynning um útboð ríkisvíxla - RIKV 25 0521 - RIKV 25 0820
Flokkur RIKV 25 0521 RIKV 25 0820
ISIN IS0000036986 IS0000037216
Gjalddagi 21.05.2025 20.08.2025
Útboðsdagur 17.02.2025 17.02.2025
Uppgjörsdagur 19.02.2025 19.02.2025

Á útboðsdegi, milli kl. 10:30 og 11:00, fer fram útboð hjá Lánamálum ríkisins á ríkisvíxlum í þeim flokkum, með þeim ISIN númerum og með þeim gjalddögum sem fram koma í töflunni hér að ofan. Greiðslur fyrir ríkisvíxlana þurfa að berast Seðlabankanum fyrir kl. 14:00 á uppgjörsdegi og verða bréfin afhent rafrænt sama dag.

Að öðru leyti er vísað til almennrar lýsingar íslenskra ríkisvíxla og almennra útboðsskilmála á heimasíðu Lánamála ríkisins.

Nánari upplýsingar veitir Oddgeir Gunnarsson, Lánamálum ríkisins í síma 569 9635.