Ríkissjóður gefur út skuldabréf í evrum

20.05.25
Ríkissjóður gefur út skuldabréf í evrum

Ríkissjóður Íslands gaf í dag út skuldabréf að fjárhæð 750 milljónir evra, jafnvirði um 109 milljarða króna. Skuldabréfin bera 2,625% fasta vexti og voru gefin út til 5 ára á  ávöxtunarkröfunni 2,672%. Andvirði útgáfunnar verður varið í að styrkja gjaldeyrisforða Seðlabanka Íslands og endurfjármagna útistandandi evrubréf. Samhliða tilkynningu um útboð á nýju skuldabréfi var tilkynnt um að ríkissjóður gerir tilboð í endurkaup á útistandandi skuldabréfi í evrum sem er á gjalddaga á næsta ári. Tilboðið stendur til föstudagsins 23. maí.

Fjárfestar sýndu útgáfunni mikinn áhuga og nam heildareftirspurn um 4,4 milljörðum evra eða tæplega sexfaldri fjárhæð útgáfunnar. Fjárfestahópurinn samanstendur af eignastýringarsjóðum, bönkum, seðlabönkum, lífeyrissjóðum, tryggingafélögum og öðrum fagfjárfestum, aðallega frá Evrópu. Umsjón útgáfunnar var í höndum Citibank, Barclays Bank, JP Morgan og BNP Paribas.  
                                                                                               
Daði Már Kristófersson, fjármála- og efnahagsráðherra: 
„Það er mjög ánægjulegt að sjá hinn mikla áhuga sem fjárfestar sýna útgáfu ríkissjóðs og þau bættu kjör sem erum að ná að þessu sinni. Fjárfestahópurinn sem taldi rúmlega 100 aðila, er fjölbreyttur og nær því markmiði að breikka fjárfestahópinn í skuldabréfum ríkissjóðs. Viðtökur endurspegla mikið traust fjárfesta á efnahags- og ríkisfjármálum á Íslandi og á þeirri stefnu sem ríkisstjórnin hefur sett fram.“

Vaxtakjör ríkissjóðs í þessu útboði eru umtalsvert betri en í síðustu útgáfu, en útgáfur ríkissjóðs eru verðlagðar með hliðsjón af millibankavöxtum (Mid-swap rate). Álagið á millibankavexti nú er 42 punktar, en var 95 punktar í grænu útgáfu ríkissjóðs á síðasta ári sem var til 10 ára. Álagið á ríkissjóð hefur farið lækkandi þrátt fyrir óvissu í alþjóðlegum efnahagsmálum og jafnvel batnað meira en hjá sambærilegum útgefendum með svipað lánshæfismat.

„Útgáfan nú er í samræmi við þá stefnu í lánamálum ríkissjóðs og miðar að því að ríkissjóður sé reglulegur útgefandi á alþjóðamörkuðum. Sagan sem við höfum að segja þykir góð í samanburði við það sem margar aðrar þjóðir eru að glíma við; góður hagvöxtur og hagvaxtarhorfur, lækkandi verðbólga, aukin fjölbreytni í útflutningi og sjálfbærni og bætt lánshæfismat," segir Daði Már Kristófersson.

Til baka

Aðrar fréttir

31.03.26
Ársyfirlit
Ársfjórðungsáætlun í lánamálum ríkissjóðs

Annar ársfjórðungur 2026

  • Á öðrum ársfjórðungi verða boðin til sölu ríkisbréf fyrir 40-60 ma.kr. að söluvirði.
  • Nýr óverðtryggður flokkur ríkisbréfa með gjalddaga árið 2029 verður gefinn út á ársfjórðungnum og verður stefnt á viðskiptavakt með flokkinn.
  • Flokkar sem mögulega verða boðnir út eru allir markflokkar ríkisbréfa og mun stærð þeirra og markaðsaðstæður ráða því hvort og þá hversu mikið verður selt í hverjum flokki.
  • Möguleiki er á skiptiútboðum á RIKB 26 1015 á fjórðungnum.

2.ársfj.áætlun 2026

20.03.26
Aðalmiðlarar ríkisverðbréfa
Undirritun aðalmiðlarasamninga

Í dag var skrifað undir samninga milli Lánamála ríkisins f.h. ríkissjóðs og aðalmiðlara í tengslum við útgáfu ríkisverðbréfa og viðskiptavakt á eftirmarkaði. Markmiðið með samningunum er að viðhalda aðgengi ríkissjóðs að lánsfé, efla verðmyndun ríkisverðbréfa á eftirmarkaði og stuðla að virku markflokkakerfi.

Frá og með 1. apríl 2026 hafa fimm fjármálafyrirtæki heimild til að kalla sig „aðalmiðlara með ríkisverðbréf“. Þau eru: Arion banki hf., Fossar fjárfestingarbanki hf., Íslandsbanki hf., Kvika banki hf. og Landsbankinn hf. 

Helstu atriði aðalmiðlarasamningsins eru þessi:

  • Aðalmiðlarar hafa einir heimild til þess að leggja fram tilboð í útboðum þar sem ríkisverðbréf eru boðin til kaups eða sölu.
  • Aðalmiðlarar hafa einir aðgang að sérstakri fyrirgreiðslu, t.d. endurhverfum samningum sem Lánamál ríkisins veita fyrir hönd ríkissjóðs.
  • Aðalmiðlari skuldbindur sig til að setja fram tilboð í útboðum ríkisverðbréfa fyrir a.m.k. 100 m.kr. að nafnverði.
  • Aðalmiðlari er viðskiptavaki á eftirmarkaði fyrir alla markflokka ríkisbréfa og setur fram kaup- og sölutilboð að lágmarki 50 til 100 m.kr. að nafnvirði í hvern flokk í kauphöll (nánar skilgreint í samningi).
  • Aðalmiðlari skuldbindur sig til þess að halda verðmun kaup- og sölutilboða innan tiltekinna marka sem nánar eru skilgreind í samningnum.
  • Aðalmiðlara er skylt að endurnýja tilboð sín innan 10 mínútna frá því að þeim hefur verið tekið. Aðalmiðlara er heimilt að víkja út frá hámarksmun kaup- og sölutilboða ef tilteknum skilyrðum er fullnægt.
  • Samningurinn gildir frá 1. apríl 2026 til 31. mars 2027.

Nánari upplýsingar veitir starfsfólk Lánamála ríkisins, netfang: [email protected].